झापा–नेपाली कांग्रेसको १४ औं महाधिवेशनका लागि वडादेखि केन्द्र सम्मका उम्मेदवारको दर्ता शुल्क प्रस्ताव गरिएको छ । निर्वाचन समितिले उम्मेदवारी दर्ता शुल्क निर्धारण गरेको हो ।
उम्मेदवारका लागि एक सय रुपैयाँदेखि ३० हजार रुपैयाँसम्म शुल्क तोकिएको छ । केन्द्रीय सभापतिको उम्मेदवारी दर्ता शुल्क ३० हजार तोकिएको हो । केन्द्रीय उपसभापति र महामन्त्री पदका लागि २५ हजार, सहमहामन्त्रीका लागि २० हजार र केन्द्रीय सदस्य पदको उम्मेदवारी दर्ताका लागि १० हजार शुल्क प्रस्ताव गरिएको छ ।
प्रदेश कार्यसमिति अन्तर्गत सभापति पदका लागि उम्मेदवारी शुल्क १५ हजार, जिल्ला सभापतिका लागि १० हजार रुपैयाँ उम्मेदवारी दर्ता शुल्क तोकिएको छ । प्रतिनिधिसभा क्षेत्रीय सभापति पदका लागि सात हजार, प्रदेशसभा क्षेत्रीय सभापतिका लागि पाँच हजार, महानगरपालिका, उपमहानगरपालिका कार्यसमिति सभापतिका लागि पाँच हजार उम्मेदवारी दर्ता शुल्क प्रस्ताव गरिएको छ ।
गाउँपालिका सभापतिको दुई हजार रुपैयाँ र वडा कार्यसमिति सभापतिका लागि पाँच सय रुपैयाँ शुल्क तोकिएको छ ।