कुलमानलाई प्राधिकरणको निर्देशक बनाउन निर्देशन
झापा–प्रधानमन्त्री शेरबहादुर देउवाले कुलमान घिसिङलाई नेपाल विद्युत प्राधिकरणको कार्यकारी निर्देशकमा नियुक्त गर्ने प्रक्रिया अगाडि बढाउन निर्देशन दिनु भएको छ । ऊर्जा मन्त्री पम्फा भुसाललाई बोलाएर प्रधानमन्त्री देउवाले यस्तो निर्देशन दिनुभएको हो ।
प्रधानमन्त्री देउवाले प्राधिकरणको सुधार र जनताको चाहनाअनुसार घिसिङलाई जिम्मेवारी दिने प्रक्रिया थाल्न मन्त्री भुसाललाई निर्देशन दिएको प्रधानमन्त्रीको सचिवालयले जनाएको छ । प्रधानमन्त्रीको निर्देशनपछि ऊर्जामन्त्री भुसालले वर्तमान कार्यकारी निर्देशक हितेन्द्रदेव शाक्यलाई राजीनामा दिएर मार्ग प्रशस्त गर्न आग्रह गर्नुभएको छ ।
यसअघि चार वर्ष विद्युत प्राधिकरणको बागडोर सम्हालेका कुलमानले दैनिक ६ घण्टा पनि नआउने बिजुलीमा उल्लेख्य सुधार गरी लोडसेडिङ अन्त्य गरेका थिए । गत भदौ २८ मा कार्यकाल सकिएपछि उनलाई नै दोहोर्याउनु पर्ने आवाज उठ्दै आएको थियो ।