अर्जुनधाराको क्वारेन्टिनमा योग, ध्यान र प्रवचन अर्जुनधाराको क्वारेन्टिनमा योग, ध्यान र प्रवचन
बिर्तामोड– एकातिर कोरोना भाइरसको त्रास, अर्कातिर घर परिवारको सम्झना । क्वारेन्टिनमा बस्ने धेरैले मानसिक रुपमा भोग्ने समस्या हो यो । अझ अव्यवस्थित क्वारेन्टिनको बसाईले धेरैलाई... अर्जुनधाराको क्वारेन्टिनमा योग, ध्यान र प्रवचन

बिर्तामोड– एकातिर कोरोना भाइरसको त्रास, अर्कातिर घर परिवारको सम्झना । क्वारेन्टिनमा बस्ने धेरैले मानसिक रुपमा भोग्ने समस्या हो यो । अझ अव्यवस्थित क्वारेन्टिनको बसाईले धेरैलाई मानसिक र शारीरिक तनाव दिएको छ । तर, झापाको अर्जुनधारा नगरपालिकाको क्वारेन्टिनमा बस्नेहरु भने यी सबै समस्याबाट मुक्त छन् ।

नगरपालिकाले उनीहरुको क्वारेन्टिन बसाईलाई सहज बनाउन दैनिक योग अभ्यास र प्रवचनका कक्षा सञ्चालन गरिरहेको छ । क्वारेन्टिनको बसाईलाई पट्यारलाग्दो हुन नदिन नगरपालिकाले बिहान बेलुका योग, ध्यान र प्रवचन गराउन थालेको अर्जुनधारा नगरपालिकाका स्वास्थ्य शाखा प्रमुख मुकुन्द बस्नेतले बताए ।

क्वारेन्टिनमा बस्नेहरु बिहान सबेरै उठ्छन् । नित्यकर्म सक्दा नसक्दै अर्जुनधारा जलेश्वर धामका व्यासाचार्य अग्निप्रसाद सिग्देल प्रवचन दिन क्वारेन्टिन स्थलमा आइपुग्छन् । सकारात्मक सोचको विकास र प्रकृति मानव सम्वन्धका विषयमा सिग्देलले नियमित प्रवचन दिन्छन् र सहभागीलाई ध्यान गर्न लगाउँछन् । ‘अहिलेको अवस्थामा आहार विहारको एकदमै महत्व छ’, व्यासाचार्य सिग्देलले भने, ‘योग र ध्यानले मानिसमा आत्मविश्वास पैदा गर्छ ।’

क्वारेन्टिनमा बस्नेहरुलाई साँझ योग सिकाइन्छ । विद्यालयको फराकिलो मैदानमा उनीहरु आउँछन् र योग अभ्यास गर्छन् । योग गुरु डा. रमेश पोखरेलले उनीहरुलाई योग सिकाउँछन् । योगले शारीरिक तथा मानसिक थकान मेट्ने भएकाले क्वारेन्टिनमा बस्नेहरु योग सिक्न लालयित हुन्छन् ।

नगरपालिकाको क्वारेन्टिन व्यवस्थित हुनुका साथै खानपनिको राम्रो प्रवन्ध भएकाले क्वारेन्टिनमा बस्नेहरुले असहज महसुस गर्नु परेको छैन । बिहानदेखि बेलुकासम्मको कार्य तालिका बनाएर नगरपालिकाले उनीहरुलाई आत्मविश्वास जगाउने गरी काम गरिरहेको छ । नगरपालिकाको व्यवस्थापनप्रति आफूहरु सन्तुष्ट रहेको स्थानीय सुनिता राईले बताइन् ।

क्वारेन्टिनमा बसेर समय कसरी बिताउने भन्ने धेरैको चिन्ताका बीच अर्जुनधारा नगरपालिकाले सुरु गरेको योग अभ्यास, ध्यान र प्रवचनको कार्यक्रम अरु पालिकाहरुका लागि पनि उदाहरण हुन सक्छ ।